Tunay nga ang kasabihang "Not all heroes wear capes!"
Sinalba ng isang tattoo artist ang isang lolo na inatake sa puso kahit hindi naman sila magkakilala. Ang tattoo artist na si Chris Mark "Mewo" Manipol ay dumayo raw sa Cavite para sa isang raket. Pagkapasok niya sa isang masikip na kalye, nakita niyang biglang nagkakagulo ang mga tao. Isang matandang nagngangalang "Arthur" ay biglang inatake sa puso. Dali-dali namang tinulungan ni Mewo si Tatay Arthur para isugod sa ospital.
Sabi ni Mewo na naalala niya raw kasi ang insidenteng inatake rin sa puso ang kaniyang sariling tatay, pero hindi niya naisalba. Wala pa raw kasi siyang kakayahan noon tulad ng kotse at pera pampaospital. Nang makita niya si Tatay Arthur, hindi rin naman daw siya nagdalawang isip na tulungan ito. Umani naman itong viral video niya ng iba't ibang papuri mula sa netizens. Kaya naman ay hindi raw dapat nang-ju-judge ng tao base sa panlabas nilang anyo. Hindi raw ibig sabihin na 'pag maraming tattoo ay masamang tao na.
Sa kasalukuyan ay maayos naman na ang lagay ni Tatay Arthur at todo-todo ang pasasalamat nito kay Mewo. Banggit din daw ng doktor na kung nahuli lang daw ng ilang segundo si Tatay Arthur na madala sa ospital ay delikado na raw ang magiging lagay niya.
Korek naman kasi! Tunay ngang walang kinalaman ang pisikal na anyo mo sa kung sino ka talaga. Saludo naman kay Mewo at hindi talaga siya nag-atubili na tumulong sa ibang tao na hindi naman niya kaano-ano. Sabi nga, libre lang ang maging mabuti! Patuloy lang tayong gumawa ng kabutihan sa ating kapwa, mga Kabisyo, at bonggang-bonggang mga blessing ang darating sa ating lahat!